Museo Etnolóxico Ribadavia

Museo Etnolóxico Ribadavia
Vista do patio interior do Museo

lunes, 22 de diciembre de 2014

BO NADAL E FELIZ 2015


O persoal do Museo Etnolóxico deséxavos un ano 2015 cheo de ledicia




Esta felicitación de Nadal forma parte do fondos do Museo Etnolóxico. Ribadavia. Fondo documental 2014/08/000519

martes, 16 de diciembre de 2014

XXI CONCERTO "TEMPO DE NADAL". Lembranza do Vilancico

Cada mes de decembro a Asociación de Amigos do Museo Etnolóxico e do Conxunto Histórico de Ribadavia organiza unha "Lembranza do Vilancico" no "Tempo de Nadal"  para ofrecer un concerto de Nadal, neste 2014 será o Grupo Vocal "Sólo Voces" de Lugo  coa dirección de Fernando G. Jácome, o domingo 21 ás 19:30 h. na Igrexa de San Francisco de Ribadavia.

O Grupo Vocal "Sólo Voces" fundouse en Lugo en 1992. Dende entón levan traballando diversos ámbitos do repertorio coral: a música popular e a culta, sempre con especial énfase nos autores galegos e baixo a dirección de Fernando G. Jácome.
Ten editados catro CDs. O seu repertorio diverso e a mestura de humor, seriedade e poesía... levounos a cantar nos ámbitos máis variados, tanto na Galiza coma fóra dela.



Para esta ocasión no Concerto de Nadal en Ribadavia interpretarán varias pezas de Francisco Guerrero, Tomás Luis de Victoria, Cristóbal de Morales e algúns anónimos estruturadas en catro partes: Ex Maria Virgine, Christus Natus Est, Circumdederunt Me Gemitus Mortis y un epílogo de Julio Domínguez: "Tres Motetes para un Tempo de Nadal".

Para saber máis sobre a historia do Grupo Vocal "Sólo Voces" e o repertorio completo que interpretarán na Igrexa de San Francisco de Ribadavia o día 21 de decembro podedes consultar o folleto do Concerto de Nadal 2014.




viernes, 5 de diciembre de 2014

I Campus do Outono 2014

En decembro os días 6, 7 e 8 ten lugar en Ourense o I Campus de Outono 2014 , programa de formación oficial do festival Outono Fotográfico 2014, que ten como obxectivo poñer a disposición de profesionais e amadores da fotografía unha oferta de formación en cultura visual innovadora.

 Esta primeira edición conta con tres convidados: Julián Barón, Eloi Gimeno e André Cepeda para impartir os obradoiros os días 6 e 7 de decembro no Centro Cultural Marcos Valcárcel, e nove convidados para o día 8 de decembro na xornada de traballo con dúas mesas de debate e a presentación dun libro na Galería PhotoArt .

Para consultar o programa completo do I Campus de Outono 2014 AQUÍ.

O director do Museo Etnolóxico, Xosé Carlos Sierra, participará na xornada de traballo do día 8 de decembro, na mesa 1 de debate titulada "Identidade/alteridade"  na que compartillará debate con Xosé Manuel Buxán, Luís D. Díaz, Sabela L. Pato e Natalia G. Devesa como moderador Vítor Nieves.

Aquí tedes unhas liñas sobre as reflexións que fará Xosé Carlos Sierra sobre o tema das identidades, que ilustrará cunha serie de fotografías pertencentes ao Arquivo Fotográfico do Museo Etnolóxico, das que vos amosamos unha parte.


campesiñado e traballo familiar



"O xogo de identidades, as construídas e as percibidas, reflíctese de xeito particular nas imaxes, tanto nas plásticas –debuxo, pintura ou escultura- como nas fotográficas e audiovisuais.




Para a antropoloxía a imaxe ten unha narrativa propia, nunca unívoca e sometida, polo tanto, a moi variadas interpretacións. A fotografía fixa, aparentemente, un instante, pero trala instantánea asoman feitos e realidades dispares.


aldea abandonada. Foto Santi M. Amil
A antropoloxía visual e a foto-etnografía  establecen un diálogo coas imaxes, moitas veces complementar da palabra e dos relatos escritos. Unha foto terma do que retrata e suxire ou agocha o que, formalmente, non se visualiza inmediatamente na imaxe ollada. As fotos, como outros soportes visuais, activan e promoven ollares cruzados, visións superpostas ou solapadas e secuencias espaciais ou temporais que a exploración e a interpretación etnográfica deben detectar.


incendios e demografía. Foto Fariñas

poda por mulleres

 
A antropoloxía manexa outros recursos dialóxicos, 
caso da foto-elicitación, método que promove o encontro entre as imaxes fotográficas e as memorias das persoas que teñen vivencias directas do fotografado.


escola unitaria

A foto conquista gradualmente o seu territorio na investigación e na divulgación etno-antropolóxica, mostrando a fecundidade da imaxe para visualizar os fenómenos identitarios e as posibilidades da antropoloxía para interpretar o que fotografías e filmes mostran do propio (o eu) e do seu contraste ( o outro".

  

máquina de costureira
paisaxe de socalcos
rehabilitación dunha aldea

jueves, 27 de noviembre de 2014

EXPOSICIÓN: ARQUIVO DO IRMÁN MANUEL RODRÍGUEZ. MARISTA



NOVAS ADQUISICIÓNS DO MUSEO ETNOLÓXICO. 2014
ARQUIVO DO IRMÁN MANUEL RODRÍGUEZ. MARISTA
DEPÓSITO DO CENTRO DE ESTUDIOS MEDIEVAIS DE RIBADAVIA

En xuño de 2011 don José Luis Chao Rey, en nome e representación do Centro de Estudios Medievais de Ribadavia ofertou ao Museo Etnolóxico o arquivo fotográfico do Irmán Manuel Rodríguez, que o Centro de Estudios Medievais recibira en doazón da familia Touza Rodríguez. En febreiro de 2014 a Consellería de Cultura, Educación e Ordenación UNiversitaria formalizaba o depósito do Arquivo do Irmán Manuel Rodríguez, integrado por 1.272 imaxes, e ordeaba o seu depósito no Museo Etnolóxico.

O arquivo é na súa meirande parte o resultado do traballo de documentación realizado sobre elementos patrimoniais do Ribeiro, destacando os bens da arquitectura, tanto relixiosa como civil, así como pedras de armas. Fotografías feitas nos arredores do ano 1960 ou pouco despois, xa que parte das mesmas foron expostas na Casa do Concello de Ribadavia o ano 1962.



 Precisamente unha mostra desa exposición, titulada «EXPOSICION DE HERÁLDICA DE RIBADAVIA», é a mostra que se expón agora no Museo Etnolóxico.


O autor, Manuel Rodríguez Rodríguez (Carballeda de Avia 1898, Santiago de Compostela 1975), irmán Marista, licenciado en Filosofía e Letras, Mestre Nacional e diplomado en Estudios Hispánicos; ten sido sido docente e director de centros en Italia, Brasil, Argentina e España e foi secretario xeral do Consejo Superior de Misiones do Ministerio de Asuntos Exteriores.


Algunhas das fotos orixinais de Manuel Rodríguez Rodríguez, que ainda conservan as cartelas antigas no lado esquerdo na parte baixa: "Leiro. Linaje de los Hermida", "Sampayo. Vista sobre el Miño", "Moldes. Castro Cavadoso"
 

jueves, 13 de noviembre de 2014

Libro: "Cruceiros do Concello de Ribadavia"

Presentamos o acceso á consulta e descarga de balde do libro: Cruceiros do Concello de Ribadavia escrito por Rubén Pino Pérez e María Jesús García Janeiro. Rubén Pino que tamén é o editor do libro cedeu ao Museo Etnolóxico a copia dixital deste libro para a súa difusión entre todas as persoas interesadas no patrimonio, pódese consultar no taboleiro que o Museo Etnolóxico ten na plataforma issuu AQUÍ.

@s autor@s fíxeron unha recensión sobre o seu traballo no blogue da Biblioteca do Museo que podedes consultar AQUÍ , onde apuntan que este libro é "un estudo dos 26 cruceiros que se conservan nas súas sete parroquias, Santo André de Campo Redondo (10), Santiago de Esposende (2), Santa María Madanela de Francelos (4), San Domingos de Fóra de Ribadavia (5), San Cristovo de Regodeigón (1), San Pedro de Sanín (2) e San Paio de Ventosela (2)".

Acceso directo á consulta e descarga de balde do libro: Cruceiros do Concello de Ribadavia


  

Agradecemos enormemente a confianza d@s autor@s no Museo Etnolóxico para a difusión do seu traballo,e por suposto darlles os parabéns polo traballo de estudo e catalogación dunha parte do patrimonio do Concello de Ribadavia, primeiro paso para a súa conservación.

viernes, 31 de octubre de 2014

Outono Fotográfico 2014 no Museo Etnolóxico

Eduardo Teixeria no local social da Igrexa da Madalena

Como cada ano o Museo Etnolóxico colabora co Outono Fotográfico na coordinación en Ribadaiva dalgunha exposición fotográfica, este ano 2014 por inciativa da Fundación Vicente Risco e a Associção para a crição do Museu Eduardo Teixeira Pinto, pódese visitar no Local Social da Igrexa da Madalena de Ribadavia á exposición do fotógrafo portugués Eduardo Teixeira Pinto co título:"Aos ollos de Eduardo" desde o 18 de outubro até o 30 de novembro




HORARIO:
Martes a venres : 12:00 a 14:00 h.
17:00 a 19:00 h.
Sábados e domingos: 11:30 a 14:00 h.




Eduardo Teixeria no local social da Igrexa da Madalena



Na exposición móstranse fotografías en branco e negro nas que con exquisita sensibilidade se reflite a vida cotiá das xentes veciñas do fotográfo portugés, o que constitúe unha interesante achega antropolóxica a unha sociedade e a un tempo.





O fotografo Eduardo da Costa Teixeira Pinto (Amarante, 1933-2009), comenzou a súa carreira como fotógrafo en 1950, na empresa «Foto Arte», propiedade do seu pai e irmáns, e na que se mantivo sempre. Membro de sociedades fotográficas de Porto, Coimbra e Évora, obtivo, entre outros recoñecementos, o Premio Camões no ano 1960. Unha mostra do seu importante arquivo fotográfico está exposta no Museu Municipal Amadeo de Souza-Cardoso, na cidade de Amarante.








 Folleto da exposición "Aos ollos de Eduardo" do fotógrafo Eduardo Teixeira Pinto


lunes, 6 de octubre de 2014

Congreso de patrimonio etnográfico

 Entre o 9 e o 13 de outubro de 2014 terá lugar en Ourense o V Congreso de Patrimonio etnográfico, II Interncacional organizado por varias institucións e asociacións: Faculdade de Ciencias da Educación do Campus de Ourense-Universidade de Vigo, Centro de Cultura Popular Xaquín Lorenzo , Asociación Ben-Cho-Shey, Nova Escola Galega e a Sociedade Iberoamericana de Pedagogía Social, este ano co título: O afiado e outras técnicas artesanais de comunidades rurais.

 O Congreso preséntase como un foro de debate e participación con conferencias, mesas redondas, saídas de estudo, relatos de experiencias, proxeccións documentais, onde se poidan extraer conclusións para a posta en práctica de novos xeitos de coñecer, recuperar, valorar e transmitir o patrimonio común. Podedes consultar o programa completo neste enlace AQUÍ.


 O venres 10 de outubro ás 9.30 h. o director do Museo Etnolóxico, Xosé Carlos Sierra, participará na Mesa de debate: A memoria do oficio facendo unha disertación co título: Representacións e discursos patrimoniais dos oficios, deixámosvos aquí uns breves apuntamentos do que serán as súas reflexións sobre o fenómeno dos oficios e das prácticas artesanais:


"Achegármonos ao mundo dos oficios artesanais implica viaxar polo tempo e facelo dende unha dobre perspectiva: a do observador que constrúe as súas propias imaxes daquelo que lle resulta alleo e a do protagonista da realidade observada, que tamén interpreta a súa maneira a actividade que practica e as vivencias a ela asociadas. Observador e observado constrúen un mundo e o significan de maneira tan lexítima como parcial, porque todos, dunha forma ou doutra, contribúen a fixar unha idea do artesanal alonxada da historia e á marxe da mirada que sobre este fenómeno pode proxectar a etnoloxía.

Os oficios son o produto da diferenciación de unidades de produción e procesos de traballo destinados á elaboración de bens ou servizos. Non todas as tarefas configuran oficios nidiamente diferenciados e elo depende, en boa medida, do desenvolvemento técnico e das condicións sociais baixo as que se exerce cada actividade. Un oficio pode agrupar varias tarefas e unha tarefa concreta pode crear un oficio especializado para a súa execución.

Asistimos hoxe a un proceso caracterizado pola disolución dun complexo agrario, que transitaba da aldea á vila e desta á cidade. Un marco territorial integrado polas relacións de dependencia, interacción e subsidiariedade tecidas entre o espazo rural e o espazo urbano. O que separaba e aínda separa, nos planos social e simbólico, o campo e a cidade era (e é) precisamente o que lles confería (e confiere) a súa unidade estrutural.
Pero non podemos nin debemos asimilar esta situación a modelos do Antigo réxime, xa que a aldea, dende a Restauración finisecular do XIX, está subordinada ao Estado e ás estruturas e marcos territoriais sobre os que o Estado e o Mercado proxectan a súa hexemonía.
A aldea conxuga, como as crónicas etnográficas clásicas nos relatan, condicións de existencia, produción económica e relacións sociais “pecapitalistas” e “preindustriais” coas novas condicións industriais e capitalistas.

As relacións de produción capitalista penetraron en todo o corpo social do territorio e delas son subsidiarias tanto as formas “tradicionais” da existencia material e inmaterial como as que desenvolveron experiencias de industrialización".

lunes, 29 de septiembre de 2014

VI xornadas internacionais de educación social e xerontoloxía

Este ano 2014 o Museo Etnolóxico foi convidado para participar nas VI xornadas internacionais de educación social e xerontoloxía co título: Boas prácticas: profesionalización e experiencias xeragóxicas, organizadas polo Colexio de educadoras e educadores sociais de Galicia (CEESG) e a Facultade de Ciencias da Educación da Universidade de Vigo que terán lugar o mércores 1 de outubro no salón de actos Marie Curie do Edificio Politécnico do Campus de Ourense, o acceso o programa das xornadas AQUÍ.

A participación do Museo nestas xornadas é por partida dobre:

-por un lado o día 1 de outubro ás 17.30 a equipa técnica do Museo Etnolóxico formada por: Pilar Iglesias, Rosa Lamas e Xosé Carlos Sierra xunto coa profesora da Universidade de Vigo Fátima Braña falarán do programa Lembrar no museo incluido no proxecto Museo Aberto, e máis concretamente da exposición: Lembrar no museo 2005-2011 resultado do traballo con persoas afectadas coa enfermidade de alzheimer, que estivo até hai pouco exposta nas salas do Museo

-por outro lado na pranta baixa do Edificio de Ferro do Campus de Ourense estarán expostos, durante oito días desde o día 1 de outubro, os paneis que forman parte da exposición: Lembrar no museo 2005-2011, nos que se pode ver a través de imaxes e de reflexións o proceso de traballo durante varias edicións, e sempre en colaboración coa Asociación de Familiares de Enfermos de Alzheimer de Ourense (AFAOR), da utilización do patrimonio cultural con persoas afectadas polo alzheimer acompañadas das persoas que as coidan.


Foto da exposición: Lembrar no museo 2005-2011 nas salas do Museo Etnolóxico 















Foto da exposición Lembrar no Museo no Campus de Ourense. Universidade de Vigo